index introductio imagines || partitura exemplar translatio

e-mail

CTH 381

Exemplar --

Citatio: E. Rieken et al. (ed.), hethiter.net/: CTH 381 (Expl. --, 02.12.2017)

§ 1

1 -- UMMA tabarna mNIR.GÁL LUGAL.GAL LUGAL KUR URUḫatti DUMU mmuršīli LUGAL.GAL LUGAL KUR URUḫatti UR.SAG

2 -- mān UN-ši [mem]iaš kwiški nakkiyašzi

3 -- nu=z(a) ANA DINGIRMEŠ arkuwar [D]Ù-zi

4 -- šuḫḫi=kan šer dUTU-i menaḫḫanda 2 GIŠBANŠUR AD.KID [k]ariyanda dāi

5 -- 1 GIŠBANŠUR ANA dUTU URUPÚ-na Ù DINGIRMEŠ LÚMEŠ [1 GIŠBA]NŠUR dāi

6 -- nu=ššan 35 NINDA.GUR4.RA tarnaš ŠA ZÌ.DA D[U]R5 [DUGDÍLIM.G]AL SIG LÀL ŠÀ.BA Ì.DÙG.GA NINDA.Ì.E.DÉ.A DUGÚTUL šūwan me[m]al=ma DUGDÍLIM.GAL šūwan 30 DUGKUKUB GEŠTIN

7 -- nu GIM-an kī S[IxSÁ-et]

8 -- nu=kan LUGAL-uš šuḫḫi šarā pāizzi

9 -- n=aš ANA dUTU [Š]AMĒ [UŠK]EN

§ 2

10 -- nu kiššan memai

11 -- dUTU ŠAME Ù dUTU URUPÚ-na GAŠAN-YA [MUNU]S.LUGAL GAŠAN-YA MUNUS.LUGAL Š[A KU]R URUḫatti d10 LUGAL ŠAME EN-YA dḫepat MUNUS.LUGAL GAŠAN-YA d10 [UR]U.[GI]ŠGIDRU-ti LUGAL ŠAME BE2 KUR URU.GIŠGIDRU-ti EN-YA d10 URUziplan[da] EN-YA ŠA d10 āššiyanz(a) DUMU-aš EN KUR URU.GIŠGIDRU-ti dšeriuš GU4ḫurri3 DINGIR LÚMEŠ DINGIR MUNUSMEŠ ḫūmanteš ḪUR.SAGMEŠ ÍDMEŠ ŠA KUR URU.GIŠGIDRU-ti ḫūmanteš ENMEŠ

12 -- DINGIRMEŠ ENMEŠ dUTU URUPÚ-na GAŠAN-YA Ù DINGIRMEŠ ḫūmanduš ŠA KUR URUKÙ.BABBAR-ti ENMEŠ LÚSANGA=(a)z kwedaš

13 -- ŠA KUR URUḫatti=mu=kan EN-UTTA ḫūmandaz kwiēš memišten

§ 3

14 -- kinuna=mu DINGIRMEŠ ammel ŠA LÚSANGA-KUNU ARAD-KUNU memian arkuwar ištamašten

15 -- ḫūdak=ma=z šumel=pat ŠA EN-LÍ DINGIRMEŠ ŠA ÉMEŠ DINGIR-LIM-KUNU ŠA ALAM-KUNU arkuwar iyami

16 -- DINGIRMEŠ ŠA KUR URU.GIŠGIDRU-ti GIM-an iyanteš

17 -- GIM-ann=a=at idalawaḫḫanteš

§ 4

18 -- EGIR-ŠU=ma=z(a) ŠA ZI-YA AWATEMEŠ arkuwar iyami

19 -- nu=mu DINGIRMEŠ ENMEŠ GEŠTU-an parā ēpten

20 -- nu=mu kē arkuwarriḪI.A ištamašten

21 -- nu=z(a) AWATEMEŠ kwe ANA DINGIRMEŠ ENMEŠ arkuwar DÙ-mi

22 -- nu kī AWATEMEŠ DINGIRMEŠ ENMEŠ dattin

23 -- ištamaštini=at

24 -- kwe=ma=mu AWATEMEŠ UL ištamašteni

25 -- ammuk=ma=z=at9 ANA DINGIRMEŠ arkuwar iyami=pat

26 -- n=at=mu=kan UN-az KA×U-az šarā wezzi=pat

27 -- n=at DINGIRMEŠ ENMEŠ ištamaššuwanzi parā tarništen

§ 5

28 -- dšeriš=ma EN-YA GU4 ŠA d10 ŠA KUR URUKÙ.BABBAR-ti peran tianz(a)

29 -- nu=mu kēdaš ANA AWATEMEŠ arkuwar tiyauwaš ANA DINGIRMEŠ tarkummai

30 -- nu=mu DINGIRMEŠ ENMEŠ kē AWATEMEŠ arkuwar DINGIRMEŠ ENMEŠ nepišaš KI-ašš=a ištamaššandu

§ X1

31 -- dUTU ŠAME dUTU URUPÚ-na d10 URUPÚ-na dmizzullaš10 dḫullaš d.MUNUSzinduḫiyaš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUarinna d10 eḫellibi d10 šuḫurribi

§ X2

32 -- d10 ḪI.ḪI dḫepat URUšamuḫa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšamuḫa

§ X3

33 -- d10 piḫaššaššiš dUTU URUPÚ-na dḫepat MUNUS.LUGAL ŠAME d10 DU6 DINGIRMEŠ ŠA É.GAL ḫuḫḫaš

§ X4

34 -- d10 URUḫalab dḫepat URUḫalab dIŠTAR LÍL URUšamuḫa dBĒLAT AYAKKI dapāraš ŠA URUšamuḫa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšamuḫa

§ X5

35 -- d[10] NIR.GÁL dḫepat d10 URUšaḫpina DINGIR LÚMEŠ DINGIR MUNUSMEŠ ḪU[R.S]AGMEŠ ÍDMEŠ ŠA URUkadapa

§ X6

36 -- d[10] šartiyaš MUNUS.LUGAL URUkadapa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA [UR]Ukadapa d10 tetḫišnaš d10ḪI.A ḫūmanteš

§ X7

37 -- d10 URUKÙ.BABBAR-ti šarkuš AMAR-uš d10 KARAŠ dUTU URU.GIŠGIDRU-t[i] dLAMMA URUKÙ.BABBAR-ti d10 URUḫalab dḫepat URUḫalab URUKÙ.BABBAR-ti dA.A-aš ddamkinnaš dZA.BA4.BA4 dDAG-iš dallatum dIŠTAR URUninuwa DINGIRMEŠ lulaḫiyaš dkupapaš

§ X8

38 -- dIŠTAR URUḫaddarina dpirwaš dašgašipaš ḪUR.SAGpiškurunuwa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUKÙ.BABBAR-ti dkarziš dḫapandaliyaš ḪUR.SAGtatta ḪUR.SAGšummiyara

§ X9

39 -- d10 URUziplanda ḪUR.SAGdaḫa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUziplanda

§ X10

40 -- [dz]itḫariyaš d10 KARAŠ DUMU d10 dLAMMA KUŠkuršaš ḪUR.SAGMEŠ ÍDMEŠ ŠA URUzitḫara

§ X11

41 -- [ ... ] dUTU URUPÚ-na DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUurauna

§ X12

42 -- [d10 UR]Ukummanni dḫepat URUkummanni d10 šinapši dḫepat GIŠšinapši d10 ḪUR.SAGmanuziya dNIN.GAL dpišanuḫiš ḪUR.SAGgallištapaš DINGIR LÚMEŠ DINGIR MUNUSMEŠ ḪUR.S[AGMEŠ Í]DMEŠ ŠA URUkummanni Ù ŠA KUR URUkummanni

§ X13

43 -- d10 piḫamiš DINGIR MUNUS-TUM ŠA d10 piḫami ŠA URUšanaḫwitta DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšanaḫwitta

§ X14

44 -- d10 URUneriqqa dZA.BA4.BA4 KI.MIN dtelipinuš dzaḫapunaš ḪUR.SAGzaliya[n]uš ŠA URUgaštama ḪUR.SAGzaliyanuš d[t]azzuwašiš DINGIR LÚMEŠ DINGIR MUNUSMEŠ ŠA URUgaštama

§ X15

45 -- dLAMMA URUḫatenzuwa ḪU[R.]SAGḫāḫarwa DINGIR LÚMEŠ DINGIR MUNUSMEŠ ŠA URUnerikka Ù ŠA KUR URUtakupša

§ X16

46 -- d10 URUšarišša dIŠTAR-liš DINGIR LÚMEŠ DINGIR MUNUSMEŠ ŠA URUšarišša

§ X17

47 -- d10 URUḫurma ŠA URUḫurma dḫantidaššuš d10 dḫepat URUḫalab ŠA URUḫurma DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ KI.MIN

§ X18

48 -- ŠA URUlauwanzatiya dḫāšigašnawanz(a) dmulliyaraš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUlauwazantiya

§ X19

49 -- [d10 URU … -i]k d10 URUuda dḫepat-LUGAL-maš DINGIR LÚMEŠ [DINGIR MUNUSME]Š ḪUR.SAGMEŠ ÍDMEŠ ŠA URUuda

§ X20

50 -- DINGIR-LIM URUparša taknaš d[UTU-uš DINGIR LÚ]MEŠ DINGIR MUNUSMEŠ ḪUR.SAGMEŠ ÍDMEŠ ŠA URUparša

§ X21

51 -- d10 URUḫiššašḫapa d10 URUkuliwišna DINGIR LÚMEŠ DINGIR MUNUSMEŠ ŠA É.GAL dUTU-ŠI

§ X22

52 -- d10 URUgaraḫna dLAMMA URUgaraḫna d.MUNUSalāš d10 URUDU6 DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUkaraḫna

§ X23

53 -- d10 URUšugazziya dzūlimaš DINGIR LÚMEŠ DINGIR MUNUSMEŠ ŠA URUšugazzi

§ X24

54 -- d10 URUliḫšina dtašimiš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUliḫšina

§ X25

55 -- dtelipinu ŠA URUdurmitta DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUdurmitta

§ X26

56 -- d10 URUnenašša ŠA URUnenašša dlušitiš ÍDmaraššantiyaš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ [Š]A URUnenašša

§ X27

57 -- dGAZ.BA.YA15 URUḫūpišna d10 URUḫūpišna dZA.BA4.BA4 URUḫūpišna ḪUR.SAGšarlaimiš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫūpišna

§ X28

58 -- d10 URUtuwanuwa dšaḫḫaššaraš ŠA URUtuwanuwa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUtuwanuwa

§ X29

59 -- d10 URUillaya dZA.BA4.BA4 ŠA URUillaya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUillaya

§ X30

60 -- ŠA URUšuwanzana dšuwanzipaš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšuwanzana

§ X31

61 -- dZA.BA4.BA4 URUarziya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUarziya

§ X32

62 -- d10 URUḫurniya ŠA URUḫurniya LUGAL-uš DINGIR-LUM-uš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫurniya

§ X33

63 -- d10 URUzarwiša dnawatiyalaš ŠA URUzarwiša DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUzarwiša

§ X34

64 -- DINGIR.MAḪ URUšaḫḫaniya d10 URUšaḫḫaniya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšaḫ[ḫaniya]

§ X35

65 -- d10 URUpaḫtima d10 URUšaḫḫuwiya dUTU URUmalitaškuriya

§ X36

66 -- dwašḫaliyaš ŠA URUḫarziuna d10 [URUḫarziuna] DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫarziuna

§ X37

67 -- ŠA URUšallapa dzanduza EN-aš d10 URUšallapa DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUšallapa

§ X38

68 -- d10 URUūšša d10 URUpar(a)šḫunta ḪUR.SAGḫuwalanuwanda ÍDḫūlaya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA KUR ŠAPLITI

§ X39

69 -- dIŠTAR URUwašuduwanda dḫepat URUwašuduwanda dIŠTAR URUinnuwita

§ X40

70 -- d10 URUalazḫana dtelipinuš ŠA URUḫanḫana dammamaš ŠA URUḫaḫana ḪUR.SAGtakurga DINGIR LÚMEŠ MUNUSMEŠ ḪUR.SAGMEŠ ÍDMEŠ ŠA URUḫaḫana

§ X41

71 -- ŠA URUtawiniya dtelipinuš dkataḫḫaš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUtawiniya

§ X42

72 -- dUTU URUwašḫaniya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA KUR URUwašḫaniya

§ X43

73 -- EN URUlānta DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUlānta DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫattina

§ X44

74 -- DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫarpiša ŠA URUkalimuna dkarmaḫiš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUkalimuna

§ X45

75 -- DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUḫakpišša

§ X46

76 -- dLAMMA LÍL dLAMMA LUGAL DINGIR LÚMEŠ DINGIR MUNUSMEŠ ŠA ABI ABI dUTU-ŠI

§ X47

77 -- DINGIR LÚMEŠ DINGIR MUNUSMEŠ ŠA ABI dUTU-ŠI

§ X48

78 -- DINGIR LÚMEŠ DINGIR MUNUSMEŠ ŠA AMA.AMA dUTU-ŠI

§ X49

79 -- DINGIR LÚMEŠ DINGIR MUNUSMEŠ ŠA É URUgazzimara

§ X50

80 -- ŠA URUankuwa dḫataḫḫaš d10 ZUNNI dIŠTAR LÍL DINGIR LÚMEŠ MUNUSMEŠ ḪUR.SAGMEŠ ÍDMEŠ ŠA URUankuwa

§ X51

81 -- ŠA URUnenišakuwa dpirwaš ŠA URUduruwaduruwa dpirwaš ŠA URUikšuna dpirwaš

§ X52

82 -- dIŠTAR URUšullama d10 URUḫatrā DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA KUR URUišuwa

§ X53

83 -- d10 URUtegarama DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA KUR URUtegarama

§ X54

84 -- MUNUS.LUGAL URUpaliya

§ X55

85 -- d10 URUtūpazziya DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUtūpazziya

§ X56

86 -- ŠA URUkariuna dkarunaš

§ X57

87 -- d10 miyannaš d10 dḫepat URUapzišna DINGIR LÚMEŠ DINGIR MUNUSMEŠ ŠA URUapzišna dLAMMA URUkalašmitta

§ X58

88 -- ŠA URUtapiqqa dtamišiyaš DINGIR LÚMEŠ DINGIR MUNUSMEŠ ḪUR.SAGMEŠ ÍDMEŠ ŠA URUtapiqqa

§ X59

89 -- d10 ŠA É ftawannanna d10 ḫulaššaššiš DINGIR LÚMEŠ DINGIR MUNUSMEŠ ŠA LUGAL-RI Ù ŠA MUNUS.LUGAL-TI

90 -- kwiēš daranteš

91 -- kwiēš UL daranteš

92 -- kwetaš ANA ÉMEŠ DINGIRMEŠ LUGAL MUNUS.LUGAL peran EGIR-pa iyantari

93 -- kwetaš=at ANA ÉMEŠ DINGIRMEŠ peran EGIR-pa UL iyantari

94 -- n=aš LÚ.MEŠSANGA šippanz(a)kanzi

95 -- DINGIR LÚMEŠ DINGIR MUNUSMEŠ [A]N-aš GE6-iš KI-aš nepiš tekan alpuš IMḪI.A-uš tetḫimaš wantewantemaš tuliyaš pēdaš DINGIRMEŠ kwedani pedi tuliya tiškanzi

§ X60

96 -- dUTU ŠAME EN-YA ŠA DUMU.LÚ.U19.LU LÚSIPA-aš

97 -- šarā=kan uwaši nepišaš dUTU-uš arunaz

98 -- nu=ššan nepiši tiyaši

99 -- dUTU ŠAME EN-YA ŠA DUMU.LÚ.U19.LU-TI UR.GI7-maš ŠAḪ-aš gimrašš=a ḫwitnaš DINAM UD-tili zik dUTU-uš ḫanneškeši

§ X61

100 -- nu kāša ammuk mNIR.GÁL LUGAL-uš LÚSANGA ŠA dUTU URUPÚ-na Ù DINGIRMEŠ ḫūmandaš nepišaš dUTU-i arkwiškemi

101 -- nu nepišaš dUTU-uš EN-YA kēdani UDKAM-ti DINGIRMEŠ arāi

102 -- nu DINGIRMEŠ kwiēš kēdani UD-ti kwedani arkuwēšni IŠTU EME-YA ḫalziḫḫun

§ X62

103 -- n=aš nepišaš dUTU-uš nepišaz KI-az ḪUR.SAGMEŠ-az ÍDMEŠ-az IŠTU ÉMEŠ DINGIRMEŠ-ŠUNU GIŠGU.ZAMEŠ-ŠUNU ḫalzāi

§ X63

104 -- EGIR-ŠU=ma LUGAL-uš kiššan memai

105 -- d10 piḫaššaššiš EN-YA DUMU.LÚ.U19.LU-aš ešun

106 -- ABU-YA=ma ANA dUTU URUPÚ-na Ù ANA DINGIRMEŠ ḫūmandaš LÚSANGA ē[š]ta

107 -- nu=mu=z(a) ABU-YA DÙ-at

108 -- d10 piḫaššaššiš=ma=mu annaz dāš

109 -- nu=mu šallanut

110 -- nu=mu ANA dUTU URUPÚ-na Ù ANA DINGIRMEŠ ḫūmandaš LÚSANGA iyat

111 -- ANA KUR URUḫatti=ma=mu LUGAL-eznanni dāiš

§ X64

112 -- [k]inuna ammuk mNIR.GÁL LUGAL-uš tuedaz [IŠ]TU d10 piḫaššašši šallanuwanz(a) arkuwēškemi

113 -- [nu I]ŠTU EME-YA kwiēš DINGIRMEŠ ḫalziḫḫun

114 -- nu ANA DINGIRMEŠ arkuwanun

115 -- nu=mu=kan DINGIRMEŠ-aš uwayanut dapiaš

116 -- ammel=ma ŠA mNIR.GÁL ARAD-KA A[W]ATEMEŠ ŠA EME-YA dā

117 -- n=at=kan ANA PANI DINGIRMEŠ šunni

118 -- nu=z(a) ANA DINGIRMEŠ kwe AWATEMEŠ arkuwar iyami

119 -- n=at=mu EGIR-pa lē waḫnuwanzi

§ X65

120 -- MUŠEN-iš GIŠtaptappan EGIR-pa ēpzi

121 -- n=aš TI-zi

122 -- uk=ma=[z](a)=kan d10 piḫaššaššin EN-YA EGIR-pa AṢBAT

123 -- nu=mu TI-nut

124 -- nu=z(a) ANA DINGIRMEŠ kwit arkuwar iyami

125 -- nu=kan AWATEMEŠ ANA DINGIRMEŠ anda šunni

126 -- nu=mu ištamaššandu

127 -- nu apiya=ya d10 piḫaššaššin šarliškemi

§ X66

128 -- nu ammel kuwapi AWATEMEŠ DINGIRMEŠ ištamaššanzi

129 -- nu=mu=kan kwiš idaluš memiaš ZI-ni anda

130 -- n=an=mu DINGIRMEŠ EGIR-pa SIG5-aḫḫanzi šarlanzi

131 -- nu=z(a) kwēl walliyatar

132 -- UL=z(a) ŠA d10 piḫaššašši EN-YA walliyatar

133 -- nu mān DINGIR-LAM našma DUMU.LÚ.U19.LU-TI aušzi

134 -- nu kiššan memai

135 -- ḫandan=wa d10 piḫaššaššiš EN-YA nepišaš LUGAL-uš UN-an kaništa

136 -- nu=war=an kulānitta

137 -- nu=war=an=kan aššanut

138 -- nu=war=an=kan mēḫunaš arnut

139 -- nu uwanzi zilatiya DUMU-YA DUMU.DUMU-YA LUGALMEŠ MUNUS.LUGALMEŠ ŠA URUḫatti DUMUMEŠ.LUGAL BELUMEŠ=ya ANA d10 piḫaššašši EN-YA naḫšarriškewan tiyanzi

140 -- nu kiššan memanzi

141 -- ḫandan=wa aši DINGIR-LIM šarkuš UR.SAG-iš parā ḫandanz(a) DINGIR-LUM

142 -- nu=tta DINGIRMEŠ ŠAME ḪUR.SAGMEŠ ÍDMEŠ waliyanzi

§ X67

143 -- uga=kan ANA mNIR.GÁL ANA ARAD-KA ZI-anz(a) anda dušgai

144 -- nu d10 piḫaššaššin EN-YA šarlāmi

145 -- ÉMEŠ.DINGIRMEŠ=ya=tta kwe iyami

146 -- šaklaušš=a=da kwiēš [DÙ]-mi

147 -- nu=z(a)=kan d10 piḫaššaššiš EN-YA pa[rā d]uškatti

148 -- nu NINDA.GUR4.RA išpanduzzi=ya kwin ANA d10 piḫaššašši EN-YA peškemi

149 -- n=an=ši dušgarauwanz(a) piškellu

150 -- pidduliyawanz(a)=ma=da lē peškemi

151 -- nu=mu d10 piḫaššaššiš EN-YA armuwalašḫaš iwar šer armūwalai

152 -- nepišaš=ma=mu dUTU-aš iwar šer wantāi

§ X68

153 -- nu=mu ZAG-ni GEŠPÚ katta iyanni

154 -- nu=mu=kan GU4-i GIM-an ḫwittiyauwanzi ḫarpiyaḫḫut

155 -- d10-nili=ma=mu awan šarā iyanni

156 -- nu ḫandan ūk kiššan memallu

157 -- IŠTU d10 piḫaššašši=wa=z(a) kanišša[nz(a) šall]anuwanz(a) mimmamešš=a

158 -- nu=wa=kan [ … ]-ešta

159 -- nu=kan GIM-an [ ... ] ḫalz[i- ... ]

§ 6

160 -- [ … -z]i aššanuzzi

20 -- [ … ] NINDA.GUR4.RA ANA dUTU AN-I KI.MIN PAB

162 -- [ … -š]iyazzi

§ 7

163 -- [EGIR-Š]U=ma NINDA.GUR4.RAḪI.A paršiya

§ 8

164 -- 3 NINDA.GUR4.RA ŠA ZÌ.DA DUR5 tarnaš ANA dUTU URUPÚ-na

165 -- n=aš=kan ŠÀ-BI LÀL Ì.DÙG.GA šunniyazi

166 -- n=aš=kan GIŠBANŠUR-i ŠA dUTU URUarinna dāi

167 -- [EGI]R-ŠU=ma NINDA.Ì.E.DÉ.A memal ANA NINDA.GUR4.RAḪI.A šer šuḫḫai

168 -- 1 DUGKUKUB GEŠTIN šipanti

§ 9

169 -- [EGI]R-ŠU=ma ANA d10 piḫaššašši 3 NINDA.GUR4.RA BABBAR ŠÀ.BA 1 SA5 paršiya

170 -- n=aš=kan ŠÀ-BI LÀL Ì.DÙG.GA šunniyazi

171 -- n=aš=kan GIŠBANŠUR-i ŠA d10 piḫaššašši dāi

172 -- EGIR-ŠU=ma=kan memal NINDA.Ì.E.DÉ.A ANA NINDA.GUR4.RAḪI.A šer šuḫḫai

173 -- 1 DUGKUKUB GEŠTIN peran šippanti

§ 10

174 -- EGIR-ŠU=ma ANA dḫepat 3 NINDA.GUR4.RA BABBAR ŠÀ.BA 1 SA5 paršiya

175 -- n=aš=kan ŠÀ-BI LÀL Ì.DÙG.GA šunniyazi

176 -- n=aš=kan GIŠBANŠUR dḫepat dāi

177 -- EGIR-ŠU=ma NINDA.Ì.E.DÉ.A memal ANA NINDA.GUR4.RAḪI.A šer šuḫḫai

178 -- 1 DUGKUKUB GEŠTIN peran šippanti

§ 11

179 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 ANA d10 ŠAME paršiya

180 -- n=aš=kan ŠÀ-BI LÀL Ì.DÙG.GA šunniyazi

181 -- n=aš=kan GIŠBANŠUR d10 ŠAMĒ dāi

182 -- EGIR-ŠU=ma NINDA.Ì.E.DÉ.A memal ANA NINDA.GUR4.RAḪI.A šer šuḫḫai

183 -- 1 DUGKUKKUB GEŠTIN peran šippanti

§ 12

184 -- EGIR-ŠU=ma 3 NINDA.GUR4.RA ŠA ZÌ.DA DUR5 tarnaš ANA d10 URUKÙ.BABBAR-ti paršiya

185 -- n=aš=kan ŠÀ-BI LÀL Ì.DÙG.GA šunniyazi

186 -- n=aš=kan A-NA GIŠBANŠUR ŠA d10 URUKÙ.BABBAR-ti dāi

187 -- EGIR-ŠU-ma NINDA.Ì.E.DÉ.A memal A-NA NINDA.GUR4.RAḪI.A šer šuḫḫai

188 -- 1 DUGKUKUB GEŠTIN peran šippanti

§ 13

189 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 ANA d10 URUziplanda [parš]iya

190 -- n=aš=kan ŠÀ-BI LÀL Ì.DÙG.GA šunniyanzi

191 -- n=aš=kan A-NA GIŠBANŠUR ŠA d10 URUzippalanda dāi

192 -- EGIR-ŠU=ma NINDA.Ì.E.DÉ.A memal ANA NINDA.GUR4.RAḪI.A šer šuḫḫai

193 -- 1 DUGKUKUB GEŠTIN šippanti

§ 14

194 -- EGIR-ŠÚ=ma 3 NINDA.GUR4.RA BABBAR ŠÀ.BA 1 SA5 DINGIR LÚMEŠ ḫūmandaš ŠA URUḫatti paršiya KI.MIN

195 -- n=aš=kan GIŠBANŠUR ŠA d10 piḫaššašši dāi

§ 15

196 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 ANA dšeri dḫurri paršiya KI.MIN

197 -- n=aš=kan GIŠBANŠUR-i ŠA d10 piḫaššašši dāi

§ 16

198 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 DINGIR MUNUSMEŠ ḫūmandaš ŠA URU.GIŠGIDRU-ti paršiya KI.MIN

199 -- n=aš=kan GIŠBANŠUR-i ŠA dUTU URUPÚ-na dāi

§ 17

200 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 ANA ḪUR.SAGMEŠ paršiya KI.MIN

201 -- n=aš=kan GIŠBANŠUR-i ŠA d10 URUpiḫaššašši dāi

§ 18

202 -- EGIR-ŠU=ma 3 NINDA.GUR4.RA BABBAR ŠÀ.BA 1 SA5 ANA ÍDMEŠ paršiya KI.MIN

203 -- n=aš=kan ANA GIŠBANŠUR ŠA d10 piḫaššašši dāi

§ 19

204 -- GIM-an=ma NINDA.GUR4.RAḪI.A paršiyauwanzi zinnai

205 -- nu=kan kwe AWATEMEŠ ANA dUTU-ŠI ŠÀ-ta

206 -- n=at=z(a) ANA DINGIRMEŠ arkuwar DÙ-zi

207 -- GIM-an=ma=kan arkuwar tiyauwar kar(a)ptari

§ X1

§ X2

§ X3

§ X4

§ X5

§ X6

§ X7

§ X8

§ X9

§ X10

§ X11

§ X12

§ X13

§ X14

§ X15

§ X16

§ X17

§ X18

§ X19

§ X20

§ X21

§ X22

§ X23

§ X24

§ X25

§ X26

§ X27

§ X28

§ X29

§ X30

§ X31

§ X32

§ X33

§ X34

§ X35

§ X36

§ X37

§ X38

§ X39

§ X40

§ X41

§ X42

§ X43

§ X44

§ X45

§ X46

§ X47

§ X48

§ X49

§ X50

§ X51

§ X52

§ X53

§ X54

§ X55

§ X56

§ X57

§ X58

§ X59

§ X60

§ X61

§ X62

§ X63

§ X64

§ X65

§ X66

§ X67

§ X68

§ 20

208 -- nu EGIR-ŠU 3 N[INDA.GUR4.R]A BABBAR ŠÀ.BA 1 SA5 ANA DINGIR LÚMEŠ KUR-eaš ḫūmandaš paršiya

209 -- NINDA.Ì.E.DÉ.A memal išḫūwai

210 -- LÀL Ì.DÙG.GA laḫūwai

211 -- 1 DUGKUKUB GEŠTIN BAL-ti

§ 21

212 -- EGIR-ŠU=ma 3 NINDA.GUR4.RA BABBAR ANA DINGIR MUNUSMEŠ KUR-eaš ḫūmandaš paršiya

213 -- arkuwar=z(a) kwedaš dāiš

214 -- NINDA.Ì.E.DÉ.A memal ANA NINDA.GUR4.RAḪI.A šer šuḫḫai

215 -- LÀL Ì.DÙG.GA laḫūwai

§ 22

216 -- EGIR-ŠU=ma 2 NINDA.GUR4.RA ANA ḪUR.SAGMEŠ ÍDMEŠ paršiya KI.MIN

§ 23

217 -- EGIR-ŠU=ma 1 NINDA.GUR4.RA kutrui dUTU-i paršiya

218 -- NINDA.Ì.E.DÉ.A memal ANA NINDA.GUR4.RAḪI.A šer šuḫḫai

219 -- LÀL Ì.DÙG.GA peran laḫūwai

§ 24

220 -- namma ŠA GIŠ-ṢI 2 GUNNI DÙ-anzi

221 -- nu NINDA.GUR4.RA kwe paršiy[a]

222 -- n=aš arḫa PANI 2 GIŠBANŠUR=pat BIL-nuzi

223 -- QATI